Home

Piyaray bachoun! Aap sab jantay hein ke urdu is our national language aur national language ka samajhna ham sab ke liyey buhat zaroori hey. Quaid e Azam ne hamein pehlay din sey yahi sikhaya ke bangali bhai lanat bhejtay hein to bhejnay do, taqseem ki bunyaad parti hey to par jaey, kisi ghareeb ko urdu bolni aati ho ya nahin, Pakistan ki national language sirf aur sirf urdu hi hogi.  Hukoomat e Pakistan ne qaaid ke is hi farman ki roshni mein English ke hutay huey bhi urdu ko as an additional national language barqarar rakha hua hey ju aik appreciable kaam hey. Jahan tak qaaid e azam ke us urdu ko hi wahid zuban ke taur per rakhnay aur is tarah east Pakistan ki alehdgi ki bunyaad ki pehli eint rakhnay ka talluq hey to yaad rahey ke quaaid e azam farishta sift insaan they aur farishtoun se ghalti ka sawal hi peda nahin huta. Yaqeenan qaaid ki koii hikmat rahi hugi jo aaj se derh so saal baad ja kar hamari samajh aaey gi.

Urdu ki tarweej ke silsilay mein hukoomat e waqt ne aik biradar islami mulk ke taawun se ye naya nisaab mutarrif karwanay ka fesla kiya hey aur jab tak parosi islami mulk ki taraf se koii imdaad nahin aati, tab tak aap log is hi qaaidey se mustafeed houngey.

Pichli bookoun ke andar ye sab se bara issue tha ke book to maujood thi magar urdu rasm ul khat ko perh ker sikhanay walay asatiza kamyaab balkey nayaab hu chukey they. Hukoomat ne is takleef ko mad e nazar rakhtay huey, asatiza o tulba ki sahoolat ke liyey is book ko roman urdu mein likhwanay ka fesla kiya hey ke urdu ka mustaqbil wesay bhi ab roman hi hey.  Jee nahin, is se muraad wo tabaah haal roman saltanat nahin balkey roman khat e tehreer hey. Ziyada dimagh chalany se perhaiz karien aur perhai per tawajjah dein.

Chounkey ye basic urdu ki book hey lehaza ham bilkul basic urdu se shroa’aat kartey huey aap ko jadeed qaida sikhaen gey.

Alif: Puranay qaidey mein Alif se Allah likha tha jo bas piyar hi piyar hutay hein. Is naey qaeday mein bhi Alif se aatay tu Allah hi hein magar is martaba wo sirf Aag mein daaltay hein. Piyaray bachoun, muhabbat insanoun se ki jati hey. Allah se sirf darna chahiyey!!!

Bay: Puranay Zamanay mein bay se balla ata tha magar ab Bay se sirf balaen aati hein. Kuch balaen parliament ke andar ghus jati hein aur baqi andar munasib jagah na milnay per bahar hi dharna de deti hein.

Pay: Pichlay qaeday ki terah Pay sey aaney wali patang ke baray mein guftgu karna abhi bhi haram hey!

Tey: Te se titli aati hey jo baray ho kar phuljari banti hey aur phir mazeed bari hu kar patakha ban kar shadi ker leti hey.

Tay: Tay sey puranay zmanay mein timatar aaya karta tha jo salad mein dalney ke kaam aatay thay. Aaj kal salad to kiya salan mein dalnay ke liyey bhi timatar nahin aatay. Tay se aanay wali sab se mash’hoor cheez Takla hey magar ham is baray mein tafesslan gugtgu se qasir hein.

Say: Say se kisi zamanay mein samar aaya karta tha jis ka matlab phal huta tha. Ab magar ham saray phal export kar key un ka juice import kar letey hein. Is lihaaz se, ab Say se imported juice aata hey.

Jeem: chey key chotay bhai ko jeem kehtay hein. Mulk mein sab se ziyada tanqeed ka shikar cheezein maslan Jamhooriyat, jiyo, jang, javed hashmi, waghera sab jeem se hi aatay hein aur danday se chalay jatay hein.

Chay: urdu zuban ke sab se ziyada istemal huney wala lafz chey hey. Shurfa mein isey ehmaq bhi kaha jata hey.

Hay: Hay sey puraney zamanay mein Halwa aata tha magar ab Halwa aata nahin sirf jaata hey. Yeh halwa kahan jata hey aur kaun khata hey, is ke baray mein swal karna aap ko daira e islam se kharij ker sakta hey. Ihtiyat kijiyey.

Khay: Khay se aanay wali cheezoun mein sab se mash’hoor cheez tehattar ka khaaien hey jis ke ba barkat tanazur mein dekhney se har cheez halal hu jati hey. Khay se kherbooza bhi ata hey but that is so middle class thing to talk about. Lets not spoil this with that.

Daal: Daal se aaj bhi sirf Gas aati hey… baqi batien sirf ghareeboun ki izzat rakhney key liyey hein.

Daal: Daal se dounga waghaira wali baat bachoun ko behlanay ke liyey ki jati hey. Dar asal ye urdu zuban ka wahid lafz hey jo lafz bhi hey aur verb bhi. Is ke baray mein tafseeli guftgo aap baray hukar khud bakhud karnay lagein gey.

Zaal: pichlay sarsathh saaloun mein zaal se is mulk ke logoun ne hamesha zillat hi li hey. Zaal se agar koii aur cheez aati bhi hey tu filhaal hamein yaad nahin.

Ray: Ray se pehlay rel gari aati thi jo ab china se aati hey aur jab marzi khari hu jati hey. Is ghalat fehmi ki islah bhi zaroori hey ke Retweet Ray se nahin, baray galay ki tasweer aur khuli zubaan ki galiyoun se aati hein.

Zay: Zay se kisi zamanar mein zebra ata tha jo ab Africa se bhi nahin aata. Kisi sehat mand gadhey per paint kar key us hi se kaam chala liya jata hey.

Seen: Seen se pehlay CNG aati thi jo ab teen teen din tak nahin aati aur agar teen din baad aa bhi jaey to teen ghantay ki zillat se pehlay nahin aati.

Sheen: Sheen se shaheed aatay hein. Har maslak, har mazhab aur har rang o nasal ke shaheed. Fauj se larnay walay bhi shaheed kehlatay hein aur fauj mein marnay walay bhi. Sheen se shahadat ke khitab ka ye istehsaal dekh ker ab sheen se sirf sharam aati hey.

Suwaad: Suwad se pehley surahi aati thi magar ab is naam ka aik banaspati ata hay. Khanay key baad anay wala suwaad suwad se nahin balkay mehaz kisi aur ke bill deney se aata hey.

Zuwad: Zuwad se aaney wali sab se mash’hoor cheez zarb e azb hey. Zuwad se aaney wali zarb e azb ka wahid masla ye hey key ya aati 50,000 laashoun aur buhat der ke baad hey

Touey: Touey se wohi touta ata hey jo achey waqtoun mein tay se aata tha. Wesay to ye donoun baatien hi bakwas hein aur touta mehaz pesoun se aata hey magar qaiday mein bhi to kuch likhna huta hey na? ye wazahat bhi zaroori hey ke tahir ul qadri, touey se nahin Aab Para se aata hey.

Zoey: Zoey se kisi zamanay mein Zuroof yani bartan aatay they. Aaj kal is kaam ke liyey shaadi ker li jati hey.

Aen: Aen se pehley sada aenak aaya karti thi aaj kal tassub wali aati hey jisey pori qaum pehan ker enjoy kerti pharti hey. Aen se aanay wali sab se mashoor cheez Immi darling hey.

Ghen: Aap ka picchla teacher aik number ka jhoota tha, Ghubbara mehaz pesoun se aata hey. Ghen se pehlay gherat bhi aati thi jo ab kisi baat par nahin aatii.

Fay: Fay se aaj bhi sarkari fawwara aata hey jis ke budget mein se contractor ka apna pora ghar ban jata hey. Followers Fay se nahin, Nangi tasaweer aur Chichouray lataaif se aatay hein.

Qaaf: Students ki mushkilaat ko mad e nazar rakhtay huey hukoomat ne qaaf ko muattal kar key Kaaf ko is ka izaafi charge de diya hey. Kisi zamanay mein jab Urdu zinda thi, Qaaf se qaaid e azam aya kartay thy. Qaaf ke muattal honay key baad ham ne china ke qaaid e azam dhoond liyey hein jo kaaf ke kantainar sey aatay hein.

Kaaf: Kisi zamanay mein Kaaf se kitaab aaya karti thi jo ab ba aasaani mehaz download ker li jati hey. Mulk ke behstar hissoun mein qaaid e azam bhi ab kaaf se aatay hein.

Gaaf: Gaaf se aanay wali dosri sab se mash’hoor cheez ghora hey.

Laam: Laam se aanay wali sab se mashoor cheez load shedding hey. Laam wo mujzati lafz hey jo kisi Muslim leagui dharay ka naam nahin hey. Baaz siyasi danishwar albatta israar kartay hein ke Muslim league Q ke aagay dar asal Q ki jagah aaj kal L laga hua hey. Maloom nahin.

Meem: Muhabbat aur Maut donoun meem se aatay hein. Kehtay hein achhey waqtoun mein meem se musalman bhi huta tha magar aaj kal ghalti se bhi nahin huta. Meem se aanay wala sab se mash’hoor lafz, Kafir hey.

Noon: Noon se aanay wali nargis pehlay apni be noori pe roti thi, magar ab stage pe nachti hey aur shurafa ghar beth ker rotay hein. Aap ki maloomat ke liyey ye bhi zaroori hey ke lafz Ganja noon se nahin ata, ye mehaz aik afwah hey.

Wow: Wow se weena malik aati hey aur Geo band kara kar chali jati hey.

Hey: Hey sey awaam ke hissay mein sirf haath hi aata hey.

Yay: Ye se pehlay yakka aata tha magar ab yakkay aur tangay ka zikar karnay per sheikh rasheed sahib bura man jatay hein. Note: Gadhay ko baap banana wala muhawra Yay se nahin aata.

Advertisements

One thought on “بیسک اردو

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s